السلام عليكم ورحمة الله وبركاته
اهلا بيكم فى منتدى حول العالم
فاضل كام يوم علي العيد كل سنه وانتو طيبين علشان كده جايه لكم بحلول سريعه لتنظيف البيت وتجهيزات العيد
طبعا كلنا عارفين العيد ده عيد اللحمه 🐐
يعني اكل وانتخه 🤭
طيب نبدأ ننضف وبعدين نجهز براحتنا
١- حضري مقشتك وزعافتك وجروفك وتعالي معايا
٢- هنلم الستاير اللي غسلناها العيد اللي فات نديها غسله سريعه كده ف الغساله انا من ناس اللي مش بنشرها بغسل واعلق علي طول وهي تنشف بقي 😂
٣- هتمشي بقي بالزعافه علي كل الأركان والحيطان اللي العنكبوت عشش فيها
٤- طبق فيه مياه دافيه وكربوناتو وبرسيل جل وفوطه واتمشي بقي أمسحي ايدين العيال اللي علمت لك ف الحيطه يا اختي
٥- طبعا المطبخ قلبناه وبالباور حميناه ولزقنا الاستيكرات ودلعنا العيال
٦- امسكي بقي الشقه وهاتي كيس ملح حطي نصه ف الجردل ومياه وديتول وامسحي واتفرجي بقي علي الطاقه السلبيه اللي هتهرب من البيت
٧- خلصنا ووضبنا نفرش بقي نفضي سجادك وافرشي بقي وملايه جديدة
وبس خلاص كده
انتخي بقي وانبسطي
طيب والتجهيزات
اولا فضي الفريزر خاااالص
ثانيا هاتي رقاق وجلاش علشان اول يوم
قشري ثوم علشان الفته
كسري العيش وخليه جاهز للتحمير
الصلصات بقي اعملي وشيلي ف فريزر صلصه بصل صلصه ساده صلصه ثوم
عصجي لحمه علشان الرقاق
واعملي كفته علشان الولاد
ويا سلام بقي لو عملتي لحمه مشوحه 🤭🤭
حله كبيره ولمي لحمتك كله بقي ضاني علي بقري ومتنسيش الليه
وحطي علي النار شمعه وسيبها تاخد وتدي وخدي أحلي لحمه ف الوجود
خلاص ليله العيد فرحي نفسك بقي وانزلي هاتي اي حاجه ليكي ان شاء الله توكه جديده
ومتنسيش تعيدي علي ابو العيال بعد صلاه العيد وتقولي له ايديك علي العيديه يا برنس
وكل سنه وانتو طيبين
بقلم الكاتبة @ام مالك
Post a Comment